नमस्तेको सिम सित्तैमा

१३ जेठ, काठमाडौं ।
प्रमुख दुरसंचार सेवा प्रदायक संस्था नेपाल टेलिकम र एनसेलबिच ब्यापारसँगै ग्राहक संख्या बढाउने होडबाजीका बिच नेपाल टेलिकमले सित्तैमा मोबाइलको सीमकार्ड दिने भएको छ । एनसेलले आफ्ना १ करोड सिम बाँडेर ग्राहक संख्या करोड पुर्याएको प्रचार बाजी गरीरहँदा टेलिकमले आफ्नो मोबाइल सेवामा ग्राहक विस्तारका लागि एसएलसीको परिक्षा दिएर बसेका विद्यार्थीहरुलाई सित्तैमा सीमकार्ड दिने योजना ल्याएको हो ।

टेलिकमका अनुसार एसएलसी परिक्षा दिएर बसेका विद्यार्थीहरुले टेलिकमको दुर्इ सय रुपैंया पर्ने जीएसएम तथा सीडीएमए मोबाइलको सीम र रीम सित्तैमा पाउने छन् । टेलिकमले विद्यार्थीहरुलाई दुर्इ सय पर्ने सीम एकसयमा दिने भएको छ ।

जसमा एकसय रुपैयाँको टेलिफोन कल रहेको हुन्छ । विद्यार्थीले तिर्ने रकम र टक भ्यालुको हिसाब गर्दा विद्यार्थीलाई सीमकार्ड सित्तैमा पर्न गएको हो ।

विद्यार्थीहरुले यसरी मोबाइलको सीमकार्ड लिनका लागि टेलिकमको सीमकार्ड लिन आवश्यक पर्ने आवेदन र्फम का साथमा २०६९ को एसएलसीमा सहभागि भएको प्रवेशपत्रको फोटोकपी बुझाउनु पर्ने छ ।

विद्यार्थीहरुसँग नागरिकता नभएको खण्डमा बाबु वा आमाको नागरिकताबाट पनि उनीहरुलाई सीमकार्ड दिने टेलिकमले जनाएको छ।  टेलिकमले आफ्ना सबै वितरण केन्द्रबाट विद्यार्थीहरुले मोबाइलको सीम तथा रीमकार्ड लिन सक्ने जनाएको छ ।