दामको पछि नलाग--सोमकृष्ण श्रेष्ठ

मात्र तिमी काम गर दामको पछि नलाग
सामाजिक सेवा गर नामको पछि नलाग

बस्नु पर्ला थुनिएर सँजाएको फन्दा भित्र
गर्छु भनी खराब त्यो कामको पछि नलाग

झुल्किएको किरणमा नयाँ जोस जाँगर छ
साँझ पख ढल्कि जाने घामको पछि नलाग

सुन्दर छ गाम बेसी सारै राम्रो हावा पानी
धुलो धुँवा सहर त्यो ठामको पछि नलाग

बाँच्न हामी खानु पर्छ मोटाउन हैन हेर
बजारमा देख्दा मिठो मामको पछि नलाग

सबै कुरा सही हुन्छ भन्नु छैन मानवमा
गल्ती देखे देवता त्यो रामको पछि नलाग

सेवा गरे पुण्य मिल्छ बेसाहारा दुःखीको
कमाउछु धर्म भनी धामको पछि नलाग